Vissir þú
Að 18 holu golfvöllurinn í Vestmannaeyjum er talinn vera einn af 200 bestu golfvöllum í Evrópu.
Fiskveiðar
Það liggur í hlutarins eðli að fiskveiðar skipa stærstan sess í stærstu verstöð landsins, en íbúar eru einungis rúm 2% þjóðarinnar. Allt frá landnámi hefur hér verið veiðistöð enda stutt að róa á fengsæl fiskimið. Og enn í dag byggist allt líf hér á fiski.
Í öðrum bæjum eru torg og stræti miðpunktur tilverunnar, hér eru það bryggjurnar. Hér eru stundaðar margbreytilegar fiskveiðar. Togaraútgerð er mikil, svo og togveiðar á smærri skipum ásamt netaveiðum að vetrarlagi, síldveiðar að hausti, loðnuveiðar að vetri og humarveiðar að sumri.
Ekki má heldur gleyma línu-og handfæraveiðum smábáta. Mikið af aflanum er unnið hér í fiskvinnslustöðvunum fyrir Bandaríkjamarkað, en einnig er stór hluti aflans fluttur út ferskur á Evrópumarkað. Og tegundirnar eru fjölmargar sem hingað berast.
Á vetrarvertíð ber mest á þorski auk þess sem gífurlegu magni af loðnu er landað hér. Á öðrum árstímum berst einnig þorskur á land og ýsa, ufsi og karfi eru mjög ráðandi tegundir í afla, ásamt öðrum svo sem lúðu, kola, steinbít og skötusel svo að einhverjar séu nefndar.
